Stella Polaris 2025

Frá 27.-29. mars 2025 verður Hátún í Tórshavnar Musikkskúla karmur um tónleikakapping fyri ungar evnaríkar tónleikarar, sum fara at framføra vand tónleikaverk fyri bæði áhoyrarum og einum dómarabólki við 5 fólkum. Til ber longu nú at melda til. 

Stella Polaris hevur sum mál at styrkja og menna skapanargleðina hjá ungu tónleikarunum og vísa fjølbroytni í klassiska tónleikinum. Fyrsta kappingin varð hildin í 2014. Tey, sum hava vunnið elsta bólkin gjøgnum árini, eru:

• 2014 – Mattias Kapnas (klaver)
• 2015 – Alvi Joensen (gittar)
• 2017 – Dávur Birgisson (gittar)
• 2019 – Ernst Dánjalsson Remmel (trompet)
• 2021 – Aksel Dánjalsson Remmel (klaver)
• 2023 – Andrias Blaasvær (violin)

Stella Polaris hevur til endamáls at stuðlað og heiðrað okkara evnaríku tónleikarum, sum eru komnir langt á tónleikaleiðini. Fleiri av luttakarunum teljast nú millum tey fremstu ungu tónleikafólkini í Norðurlondum.

Kappast verður í fýra ymiskum aldursbólkum. Hesir eru:

• 0 til og við 11 ár
• 12 til og við 15 ár
• 16 til og við 19 ár
• 20 til og við 24 ár

Tilmeldingarfreistin er 1. februar 2025. Tilmelding fer fram á heimasíðuni hjá Tórshavnar Musikkskúla