STELLA POLARIS er tónleikakapping fyri ungar klassiskar tónleikarar. Kappingin varð á fyrsta sinni hildin februar 2014. Kappingin gevur rásarúm fyri menning hjá musikalskum evnaríkum ungum, ið spæla klassiskan tónleik. Við at seta sjóneykuna júst á hetta økið, ynskir kappingin at geva sítt íkast til føroyska mentanarlívið, at vísa evnaríkum ungdómum størri ans, at vera fyrimynd fyri onnur ung, at staðfesta skapanargleði, menning og dygd og at stimbra áhugan fyri klassiskum tónleiki sum heild.

Kappingin verður 27. - 29. mars 2025

Tónleikarar sum hava tilknýti* til Føroyar, kunnu melda seg til kappingina. Tónleikarar mugu ikki vera fyltir 25 ár, tá kappingin verður hildin.
 Kappast verður í fýra aldursbólkum:

• Aldursbólkinum til og við 11 ár (luttakarar mugu ikki verða fyltir 12 ár, tá kappingin verður hildin)
• Aldursbólkinum 12 til og við 15 ár (luttakarar mugu ikki verða fyltir 16 ár, tá kappingin verður hildin)
• Aldursbólkinum 16 til og við 19 ár (luttakarar mugu ikki verða fyltir 20 ár, tá kappingin verður hildin)
• Aldursbólkinum 20 til og við 24 ár (luttakarar mugu ikki verða fyltir 25 ár, tá kappingin verður hildin)

* Orðingin, at luttakari skal hava “tilknýti til Føroya” skal skiljast soleiðis, at luttakari antin skal vera búsitandi í Føroyum ella, um búsitandi uttanlands, hava føroyskt familju tilknýti, tvs at í  minsta lagi annað foreldri er føroyskt.

Eru ivamál, tekur Musikkskúlanevndin støðu í hvørjum einstøkum føri.

Luttakararnir spæla eitt ella fleiri stykki, sum sýna teknisku og musikalsku førleikar luttakarans. Stykkini skulu vera ólík í lyndi, og vera frá fleiri ymsum tíðarskeiðum. 

• Í aldursbólkinum til og við 11 ár framførir hvør luttakari tónleik, sum er 4-5 minuttir til longdar.
• Í aldursbólkinum til og við 15 ár framførir hvør luttakari tónleik, sum er 5-6 minuttir til longdar.
• Í aldursbólkinum til og við 19 ár framførir hvør luttakari tónleik, sum er 8-10 minuttir til longdar.
• Í aldursbólkinum til og við 24 ár framførir hvør luttakari tónleik, sum er 12-15 minuttir til longdar. 

Tað stendur til tann einstaka luttakaran, um hon/hann velur at spæla við nótum ella ei.

Tilmeldingin til Stella Polaris

Tilmeldingarfresitin er 1. februar 2025

Hesar virðislønir verða latnar til Stella Polaris - Klassiskt

Virðislønir verða handaðar til vinnaran og nr. 2 og 3 í hvørjum aldursbólki.

Dómsnevndin hevur harumframt møguleika at lata talentvirðislønir í tveimum teimum yngstu aldursbólkunum.

Virðislønirnar í bólki 1 og bólki 2 eru gávukort.

Virðislønirnar í bólki 3 eru ávikavist 5.000, 4.000 og 3.000 kr.

Virðislønirnar í bólki 4 eru ávikavist 20.000, 10.000 og 5.000 kr.

Vinnarin av 1. virðisløn í aldursbólkinum 20 ár til og við 24 ár vinnur, umframt 20.000 kr, eisini møguleikan at verða solistur við Føroya Symfoniorkestri.

Í dómsnevndini eru 5 limir: ein uttanveltaður dómsnevndarformaður, eitt umboð fyri Føroya Symfoniorkestur, eitt umboð fyri áhoyrarar, eitt umboð fyri Tórshavnar Musikkskúla og eitt umboð fyri tónleikagreinina í breiðari merking.

Allar avgerðir hjá dómsnevndini eru endaligar.

Luttakararnir kunnu hava egnan klaverleikara, tá fyri egna rokning. Til ber eisini at nýta ein klaverleikara, sum er knýttur at kappingini. Hetta tilboð er ókeypis, men luttakararnir mugu rokna við avmarkaðari venjingartíð.

Luttakarar syrgja sjálvir fyri gisting og møguligari ferðing í sambandi við kappingina.

Í samband við Stella Polaris kappingina tilskilar Tórshavnar Musikkskúli sær rætt at miðla myndir frá kappingini á miðlapallum skúlans. Hesir eru: heimasíða skúlans, Tórshavnar Musikkskúli á Facebook og Tórshavnar Musikkskúli á instagram.

Um tit ikki ynskja, at mynd av tær sjálvum (yvir 18 ár) ella barni tykkara (undir 18) verður miðla, verða tit hervið biðin um at siga Tórshavnar Musikkskúla frá í telduposti til musikkskulin@torshavn.fo áðrenn 1. februar 2025

Fyriskiparin hevur rætt til at gera upptøku av framførslunum til útvarps- ella sjónvarpsnýtslu uttan at veita luttakarum gjald fyri tað.

Fyriskipari av kappingini er Musikkskúlanevnd Tórshavnar Býráðs 

Avgreiðslu skrivstova er Tórshavnar Musikkskúli, Landavegur 84, Tórshavn.

Samskipari er:

Kristina Thede Johansen

Telefon: +298 916099  

Teldupostur: kristinathedejohansen@gmail.com