Undirvísing og fyrireiking

Undirvísingin fevnir um einstaklingafrálæru í høvuðsljóðføri og klaver, umframt felags frálæru í tónleikaástøði, hoyrilæru, samanspæli, kóri og kamartónleiki. Næmingar fáa umleið 9 undirvísingartímar um vikuna, býttir yvir 2-3 dagar. Tað er neyðugt at venja dagliga fyri at røkka góðum úrslitum. Tí kann tað vera trupult at sameina Musikkskúlamiðnám við fulltíðarstarv ella aðra krevjandi útbúgving.

Undirvísingartíð og stað

Flestu undirvísingartímarnir fara fram í Tórshavnar musikkskúla. Tá undirvísingin verður løgd til rættis, verður roynt at taka atlit til ynski og møguleikar hjá næmingunum.

Møtiskylda og frávera

Møtiskylda er til alla frálæru. Fráveruprosentið verður javnan talt upp soleiðis, at fráveran ikki fer upp um 15 %, sum er hægst loyvda frávera í einstøkum faki og 10 % samanlagt. Um fráveran er ov høg, verður næmingurin kallaður til samrøðu, og í ringasta føri kann útbúgvingin verða steðgað.

Ársroyndir

Hvørt skúlaár endar við ársroyndum við uttanhýsis próvdómarum. Nøktandi úrslit eru treyt fyri at halda fram á útbúgvingini.

Frítíðir og frídagar

Skúlaárið á Musikkskúlamiðnámi fylgir fólkaskúlaárinum. Næmingar fáa eina ársætlan við skúlaársbyrjan.

Konsertir, verkstovur o.a.

Konsertir eru ein týðandi partur av útbúgvingini. Næmingar skulu luttaka í øllum konsertum, sum Musikkskúlamiðnám skipar fyri. Harumframt verða felags verkstovur og verkætlanir hildnar.

Stuðul og ferðastuðul

Næmingar á Musikkskúlamiðnámi fáa ikki lestrarstuðul.

Venjingarhøli

Næmingar kunnu nýta venjingarhølini hjá Tórshavnar musikkskúla, tá ið hølini ikki verða brúkt til frálæru. Hølini skulu bókast umvegis umsitingarskipan musikkskúlans. 

Kostnaður

Árliga gjaldið fyri Musikkskúlamiðnám er kr. 2.400,-.