Frálæra 

Undirvíst verður í blokkfloytu, men eisini verður arbeitt við sangi, rørslu og spæli, ið er mennandi fyri næmingin. Ljóðførini vit brúka er blokkfloyta, stavspæl (xylofonir), smáar trummur og onnur rútmuljóðføri, klaver og guitar.
Tá vit vita, hvussu mennandi tónleikur er, er hetta ein gyltur møguleiki hjá børnum og ungum við serligum avbjóðingum at verða ment tónleikaliga. Arbeitt verður út frá einstaklinginum, antin einstaklingaundirvísing ella í smáum bólkum. Tá næmingurin dugir betur, er møguleiki at sleppa at spæla onnur ljóðføri.

Nótar
Næmingurin fær nótar útvegaðar frá læraranum / skúlanum.

Samanspæl verður skipað eftir tørvi í mun til hvønn einstakan næming. 

Partur av frálæruni og menningini av næminginum er at framføra. Roknast kann við nakað av konsertvirksemi um árið, men tað velst um næmingin. 

Einaferð um árið skulu allir næmingar á skúlanum til eina lítla roynd, har næmingurin spælir fyri læraranum og einum øðrum lærara og fær síðani eitt støðumet. Støðumetið er vanliga um várið. 

Støðugt samskifti millum heim og skúla leggur góðar lunnar undir góða menning hjá næminginum. Umframt gerandisliga samskiftið millum lærara og foreldur eru eisini viðtalur; ein felags viðtala fyri øll foreldur við ársbyrjan og ein einstaklinga foreldraviðtala í.s.v. støðumetið um várið. 

Til ber at byrja at spæla um 7 ára aldur.

Til ber at lána ljóðføri frá skúlanum (fyrivarni verður tikið fyri, at ljóðføri er tøkt) 

Leinkja til kunning um kostnað og reglugerð (uppmøting, avboð, sjúka, farloyvi etc.)